മഞ്ഞുകാലത്ത് ശ്രദ്ധിക്കേണ്ട കാര്യങ്ങള്‍


reporter

 ഒരുപാടു സൗന്ദര്യപ്രശ്‌നങ്ങള്‍ സൃഷ്ടിക്കുന്ന ഒരു കാലാവസ്ഥയാണ് മഞ്ഞുകാലം. പാദം വെടിച്ചുകീറുക, മൊരി ഉണ്ടാകുക തുടങ്ങിയ പ്രശ്‌നങ്ങളില്‍ നിന്നും മോചനം നേടാന്‍ ഇതാ ചില എളുപ്പ വിദ്യകള്‍. മഞ്ഞു കാലത്ത് ത്വക്കിന് എണ്ണമയം നല്‍കുന്ന ഗ്രന്ഥികളുടെ പ്രവര്‍ത്തനം കുറയും. അതുകൊണ്ടാണ് ചര്‍മം വരണ്ടു മൊരിയുന്നത്. ചര്‍മസൗന്ദര്യത്തിന് എണ്ണ തേച്ചു കുളിച്ചാല്‍ ചര്‍മം മൊരിയുന്നത് ഒരു പരിധി വരെ തടയാം.ചര്‍മത്തിന് മൃദുത്വവും കിട്ടും.

എള്ളെണ്ണയും കടുകെണ്ണയും ഒലിവെണ്ണയും ചര്‍മത്തിനു ചൂടും മിനുമിനുപ്പും നല്‍കും.പത്തു മിനിറ്റു കഴിഞ്ഞ് ഇളം ചൂടു വെള്ളത്തില്‍ കുളിക്കുക. തണുപ്പാണെന്ന് കരുതി ചൂടു കൂടുതലുള്ള വെള്ളത്തില്‍ കുളിക്കരുത്. അത് ചര്‍മത്തിന്റെ സ്വാഭാവികമായ എണ്ണമയം നഷ്ടപ്പെടാന്‍ ഇടയാക്കും.

മഞ്ഞുകാലത്ത് സോപ്പ് ഉപയോഗിക്കാതിരിക്കുന്നതാണ് ചര്‍മ്മത്തിന്റെ ആരോഗ്യത്തിന് നല്ലത്. സോപ്പു തേച്ചാല്‍ ചര്‍മം കൂടുതല്‍ വരളാന്‍ സാധ്യതയുണ്ട്. പകരം പയറുപൊടിയോ കടലമാവോ ഉപയോഗിച്ചാല്‍ ചര്‍മത്തിന് കൂടുതല്‍ സ്‌നിഗ്ധത കിട്ടും. സോപ്പ് ഉപയോഗിക്കണമെന്ന് നിര്‍ബന്ധമാണെങ്കില്‍ ഗിസറിന്‍ അടങ്ങിയിട്ടുള്ള സോപ്പ് ഉപയോഗിക്കാം.കൈകാലുകളിലും കക്ഷത്തിലും ശരീരത്തിലെ മടക്കുകളിലും മാത്രം സോപ്പു തേച്ചാലും മതി. കുളി കഴിഞ്ഞാല്‍ ഉടനേ മോയ്‌സ്ചറൈസോ കോള്‍ഡ് ക്രീമോ പുരട്ടാം. നനവുള്ളപ്പോഴാണ് ചര്‍മം ഇവയെ നന്നായി വലിച്ചെടുക്കുക. ശരീരത്തിന്റെ ഈര്‍പ്പം നിലനിര്‍ത്താന്‍ ദിവസവും രണ്ടു തവണ കുളിക്കുന്നത് നല്ലതാണ്.

മഞ്ഞുകാലം മുടിക്കും ത്വക്കിനും വളരെയധികം ബുദ്ധിമുട്ടുണ്ടാക്കുന്ന ഒരു കാലാവസ്ഥയാണ്. രാവിലെ വീട്ടിലെ പണികളെല്ലാം ഒതുക്കി ജോലിസ്ഥലത്തേക്കുള്ള പാച്ചിലില്‍ സ്വന്തം ത്വക്കിനെയോ മുടിയെയോ കാര്യമായി ശ്രദ്ധിക്കാന്‍ അവര്‍ക്ക് നേരം കിട്ടുന്നില്ല.

അതിന്റെ ഫലമോ ത്വക്കെല്ലാം വരണ്ട് മുടിയും ഭംഗിയില്ലാതാവുന്നു. അല്പസമയം ചെലവഴിച്ചാല്‍ ഇത്തരം ബുദ്ധിമുട്ടുകളില്‍ നിന്ന് ആശ്വാസം ലഭിക്കുന്നു.മഞ്ഞുകാലത്ത് കഴിവതും ഷാമ്പു ഉപയോഗിക്കാതിരിക്കുക. ചെമ്പരത്തി താളിയോ, കുറുന്തോട്ടി താളിയോ ഉപയോഗിച്ച് മുടി കഴുകുക. മുടിയില്‍ കണ്ടീഷണര്‍ തേക്കേണ്ടത് അത്യാവശ്യമാണ്. ഇത് മുടിയുടെ വരള്‍ച്ച നിയന്ത്രിച്ച് മുടിക്ക് നല്ല മിനുസം നല്കുന്നു. തേങ്ങാപ്പാല്‍, കറ്റാവാഴ തുടങ്ങിയ പ്രകൃതദത്ത കണ്ടീഷണര്‍ ഉപയോഗിക്കുന്നതാണ് മുടിയുടെ ആരോഗ്യത്തിന് നല്ലത്.ആഴ്ചയില്‍ രണ്ടോ മൂന്നോ തവണ മുടിയില്‍ എണ്ണ തേച്ച് മസാജ് ചെയ്യുക. ഇതിനായി ഒലിവ് ഓയില്‍ , ബദാം ഓയില്‍ ഇവ രണ്ടും കൂടി യോജിപ്പിച്ച് ഇളം ചൂടില്‍ തലയോട്ടിയില്‍ നന്നായി തേച്ചുപിടിപ്പിച്ച് മസാജ് ചെയ്യുക.തലയില്‍ ചൂടുവെള്ളം ഒഴിക്കരുത്. ഇളം ചൂടുവെള്ളത്തില്‍ തല കഴുകാം. ഇത് മുടിയിലെ ഈര്‍പ്പം സംരക്ഷിക്കും. കുളി കഴിഞ്ഞാല്‍ മുടി നന്നായി ഉണങ്ങാന്‍ അനുവദിക്കുക.

മുടി ഉണങ്ങാന്‍ ഹെയര്‍ ഡ്രയര്‍ ഉപയോഗിക്കാതിരിക്കുക. ഇത് മുടിയെ കൂടുതല്‍ ഡ്രയാക്കി മാറ്റും. കൂടാതെ മുടി കൂടിപ്പിടിക്കാനും പൊട്ടിപ്പോകാനും ഇടയാക്കുന്നു. മുടിയില്‍ ആവി കൊള്ളിക്കുന്നത് നല്ലതാണ്.മുടി അധികം കാറ്റടിക്കാതെ യാത്രകളില്‍ ഒതുക്കി കെട്ടിവയ്ക്കുന്നതാണ് മുടിയുടെ ആരോഗ്യത്തിന് നല്ലത്. തണുപ്പുകാലമായതോടെ സൗന്ദര്യ പ്രശ്‌നങ്ങളും ഓടിയെത്തും. കാലുകള്‍ വിണ്ടുകീറുന്നതും ചര്‍മം വരളുന്നതുമാണ് തണുപ്പുകാലത്ത് നേരിടുന്ന പ്രധാന പ്രശ്‌നങ്ങള്‍.കാലുകള്‍ വിണ്ടുകീറുന്നത് തടയാനിതാ ചില വഴികള്‍:വിണ്ടുകീറല്‍ തടയാന്‍ വീട്ടില്‍ തന്നെ ചില പൊടിക്കൈകളുണ്ട്,കായവും കടുകെണ്ണയും ചേര്‍ന്ന മിശ്രിതം ഉറങ്ങുന്നതിന് മുമ്പ് വിണ്ടുകീറിയ ഭാഗത്ത് തേച്ച് കിടക്കുക.നന്നായി പഴുത്ത പഴം പള്‍പ്പ് രൂപത്തിലാക്കി കാലില്‍ തേക്കുന്നതും നല്ലതാണ്.ഗ്ലിസറിനും റോസ് വാട്ടറും ചേര്‍ന്ന മിശ്രിതം വിണ്ടുകീറിയ ഭാഗത്ത് 15 ദിവസം തുടര്‍ച്ചയായി പുരട്ടിയാല്‍ കാല് പൊട്ടിയത് പൂര്‍ണമായും ഒഴിവാക്കാനാകും.മഞ്ഞള്‍, തുളസി, കര്‍പ്പൂരം എന്നിവ തുല്യ അളവില്‍ എടുത്ത് ഇതില്‍ അല്‍പ്പം കറ്റാര്‍ വാഴയും ചേര്‍ത്ത് പേസ്റ്റ് രൂപത്തിലാക്കി പുരട്ടുന്നതും നല്ലതാണ്.ഉപ്പൂറ്റി വിണ്ടുകീറുന്നതിന്റെ പ്രധാന കാരണം കാലിന് പാകമല്ലാത്ത ചെരുപ്പ് ധരിക്കുന്നതാണ്. കാലുകള്‍ ചെരുപ്പില്‍ കുടുങ്ങിക്കിടക്കുന്ന രീതിയില്‍ ധരിക്കാതിരിക്കാന്‍ ശ്രദ്ധിക്കുക. ശരിയായ അളവിലുള്ള ചെരുപ്പ് വാങ്ങുക.തണുപ്പുകാലത്ത് വീട്ടിനുള്ളില്‍ ചെരുപ്പിടാതെ നടക്കാതിരിക്കാന്‍ ശ്രദ്ധിക്കണം. ഇത് കാലില്‍ പൊടി പിടിക്കാനും വരണ്ടുപോകാനും കാരണമാകും.

കാലുകള്‍ എപ്പോഴും വൃത്തിയായി സൂക്ഷിക്കുക.

PREVIOUS STORY